Японы мэргэжлийн сүмо бөхийн холбооны Гүйцэтгэх зөвлөл, банцүкэ шийдэх хорооны хуралдаан 2023 оны 5 сарын 31-ний өдөр болж, нацү башёд 11 давсан Мичиноку дэвжээний бөх сэкивакэ Кирибаямад озэки цол албан ёсоор олголоо.
Ингэснээр Монголоос төрсөн 6 дахь озэки цолтон болж сүмо сонирхогч Монгол түмнээ баярлууллаа. Залуу озэки маань Мэргэжлийн сүмо бөхийн холбооны “Сэкиваки цолтны сүүлийн 3 башёгийн нийлбэр 33 буюу түүнээс дээш бол озэки цол олгоно” гэсэн дүрмийн дагуу озэки цолны болзол хангасан нь энэ. Кирибаяма сүүлийн гурван башёд ямар амжилт үзүүлсэн статистикийг харвал,
- Хацү башёд Комүсүби цолон дээр 11:4 амжилтаар үзүүрлэсэн
- Харү башёд анх удаа сэкивакэ цолтойгоор 12:3 амжилтаар түрүү хүртсэн
- Нацү башёд сэкивакэ цолтойгоор 11:4 амжилтай өндөрлөж гурван башёд нийт 34 даваа цуглуулаад байна.
Бас болоогүй гурван башё дараалж гиношо шагнал хүртсэн нь Японы сүмо бөхийн холбооны өндөр босго, цол олгох дүрмийн заалтыг давуулан биелүүлж, гүйж бус гуядаж арслан цолыг хүртэж буйн илрэл болж байна.
Дараагийн башёгоос эхлэн тэрээр сүмо бөхийн нэрээ сольж, багшийнхаа Киришима нэрээр барилдах болно. Шинэ озэкигийн багш Мичинокү ояката нь Киришима нэрээр барилдан, озэки цол хүртэж байсан төдийгүй дээд зиндаанд нэг удаа түрүүлж байсан хүчтэн.
Одоо 27 настай, 186 см өндөр, 143 кг жинтэй озэкид дэмжигчдийн маш их итгэл, найдлага ирж буй. Тэр хэрээр маш хүнд нэгэн статистикийг таслахгүй байх үүрэг ноогдож эхлэх нь. Өмнөх таван арслан ах нь тавуулаа цолоо ахиулж их аварга цол хүртсэн гэх нүсэр, хүчир буухиаг үргэлжлүүлэх эсэхийг шийдэх хариуцлагатай үүрэг даалгавар түүний өмнө ирж байна.
