ХЗДХ-ын сайд Х.Нямбаатар 2023 оны 4 сарын 19-ний өдөр Засгийн газрын хуралдааны шийдвэрийг танилцуулах хэвлэлийн хуралд мэдээлэл өгөхдөө, “Энэ оны гуравдугаар сарын 23-ны өдөр Нийслэлийн Ерөнхий прокурорын газарт ЦЕГ-аас Б.Содномдаржаа, Т.Чимгээ нарт холбогдох үйлдлийг хэрэгсэхгүй болгох саналаа дахин хүргүүлсэн. Өнөөдөр Нийслэлийн прокурорын газраас мөрдөгчийн ирүүлсэн саналыг үндэслэж, Б.Содномдаржаа, Т.Чимгээ, Ц.Амгаланбаатар нарт холбогдуулан 830142 дугаартай эрүүгийн хэрэг дээр яллагдагчаар татсан тогтоолыг хүчингүй болгож, шийдвэрлэж байна. 1998 оны аравдугаар сарын 2-ны өдөр С.Зоригийг хөнөөсөн хэргийг дахин шалгаж эхэлж байна. Энэ бол олон улсын хүний эрхийн байгууллагуудын цаашид судалж, дахиж ийм үйлдэл гаргахгүй байх үйлдэл. Хүчээр хэрэг хүлээлгэж, эрүүдэн шүүсэн хэргийг цаашид судална. Мөн улс төрийн зорилготой энэ хэргийг шалгана.” гэж мэдэгдээд байсан билээ.
Тэгвэл Х.Нямбаатар сайдын тэрхүү мэдэгдлээс хойш нэг хоногийн дараа буюу төр нийгмийн зүтгэлтэн С.Зориг агсны мэндэлсэн өдөр болох 4 сарын 20-ны өдөр ТЕГ-ын дарга асан Б.Хурц үүсээд буй нөхцөл байдалтай холбогдуулан байр суурийг илэрхийллээ.
Б.Хурц хэлэхдээ, “Намайг ТЕГ-ын даргаар очхоос өмнө ТЕГ-ын даргаар Б.Ариунсан, УЕП-оор Д.Дорлигжавыг байх үед шалгаж эхлэсэн асуудал. Г.Эрдэнэбат прокурор бид хоёр үргэлжлүүлж шалгасан гэсэн үг. Үнэнийг хэлэхэд нууцын зэрэглэлээс гаргаж өгдөггүй. Би олон ч удаа хүсэлт тавьсан. Шоронд хэвтэж байхдаа хүртэл эхнэр хүүхдээрээ дамжуулан “нууцын зэрэглэлээс гаргаж өг” гэж тухайн үеийн ҮАБЗ-ийн гурван даргад хүргүүлж байлаа. Хурц нарын хэрэг гээд л ярьдаг. Үүнийгээ бас нууцын зэрэглэлээс гаргачих. Тэгэхээр бүх зүйл тодорхой болно. Бидэнд яаж ял тулгаж байсан нь. Одоо хөөс арилж байна. Хатуухан хэлчихье. Энэ бол хоёр хоригдлын хооронд хэргээ яриад зодолдоод байгаа асуудал шүү дээ. Мөн үү. Ц.Нямдоржийг сайд байхад эрүүдэн шүүлт жинхэнэ аюултай байсан. Өчигдөр Ц.Нямдорж өөрөө гарч ирж байгаа нь улстөрийн хэрэг. Улстөрийн хэрэг гэдэг нь бүр тодорхой болчихлоо.
Тэтгэвэрт гэртээ хэвтэж байсан өвгөн гарч ирээд шоу хийгээд л. Болоогүй. Магадгүй бүх юмны эхлэл ч байж магадгүй!
2017 оны үес Ж.Батзандан, Ц.Нямдорж хоёр ээлжилж гарч ирээд захиалагчийг зарлана гэцгээсэн биз дээ. Тэр бичлэгүүд байгаа. Өнөөдөр хэдэн он бэ? Энэ асуултыг тэднээс асуух ёстой. Тэд нар захиалагчийг яаж мэдээд байгаа юм. Анхааралтай хараарай! Биднээс хойш ажлын хэсгийг тараачихсан. Миний сонссоноор дахиад л тараагаад байна. Ц.Нямдоржийн арга. Чиглэл өгч заадаг хүн шүү дээ. Ц.Нямдорж бол аюултай тоглогч. Би хардаж байгаа. Өнөөдөр МАН-ын удирдлагуудыг шантаажилж, энэ хэргийг хэрэгсэхгүй болгох зам руу түлхсэн байх гэж хардаж байна” хэмээн ярилаа.
