Өнөөдөр /2023.4.20/ Монголын төр нийгмийн нэрт зүтгэлтэн, ардчиллын алтан хараацай Санжаасүрэнгийн Зориг агсны мэндэлсэн өдөр тохиож байна. С.Зориг агсны дурсгалыг хүндэтгэж Ардчилсан намын удирдлагууд түүний хөшөөнд цэцэг өргөлөө.
Ардчилсан хувьсгалын оюун санааны удирдагчдын нэг С.Зоригийн мэндэлсэн өдрийг дурсах, хүндэтгэл үзүүлэх энэхүү арга хэмжээний онцлох үйл явдал нь Ардчилсан намд үүсээд байсан хууль ёсны намын дарга, тамга тэмдгийн маргаан, үүнээс үүдэлтэй нам доторх талцал хуваагдлыг эцэслэн, талууд харилцан буулт хийж хамтын ойлголцолд хүрч буйгаа мэдэгдсэн явдал байлаа.
Удтал намын тамгыг дараагийн даргад шилжүүлэлгүй, шүүхийн маргаан үүсгээд байсан С.Эрдэнэ нь Ардчилсан намын Үндэсний бодлогын хорооны сүүлд болсон хурлаас сонгогдсон Лу.Гантөмөрийг хүлээн зөвшөөрч буйгаа илэрхийлж, намын тамгыг шилжүүлэн өгсөн нь өнөөдрийн онцлох үйл явдал байлаа.
С.Эрдэнэ хэлэхдээ, “Ардчилсан намын үнэт зүйл, үзэл санааны эцэг болсон энэ хүнийхээ төрсөн өдөрт бид хүндэтгэл үзүүлж, энэхүү арга хэмжээгээ эхлүүлж байна. Энэ хүндэтгэлт өдөр бид Ардчилсан намын дотоодод үүсээд байсан зарим нэг үл ойлголцлын асуудлуудад цэг тавьж, Ардчилсан нам нэгдмэл нэг удирдлагатай, нэг зорилготой болж улс орны нийгэм эдийн засгийн хувьд үүсээд буй олон чухал асуудлуудыг шийдэх ажилд ханцуй шамлан нэгдэж орох үйл явдлыг эхлүүлсэн өдөр тохиож байна. Бид цаашдаа улс орныхоо сайн сайхны төлөө, монголын ардчиллыг улам бэхжүүлэхийн тулд нэгдмэл нэг санаа зорилготойгоор тэмцэх болно.Монголд ардчилал шударга ёс, нийгмийн сайн сайхны төлөөх үйл хэргийг манлайлах хүндтэй хариуцлагатай үүргийг хүлээж байгаа Ардчилсан намын шинээр сонгогдсон дарга Л.Гантөмөрт энэ сайхан хүндтэй өдөр хариуцлагатай албыг гардан авч байгаа явдалд баяр хүргэж, амжилт хүсье ” гэлээ.
Ардчилсан намын тамгыг албан ёсоор гардан авсан намын шинэ дарга Л.Гантөмөр, “Өнөөдөр бид С.Зориг агсныхаа төрсөн өдрөөр хоорондоо тавьж буй тангараг бол Монголоо хөгжүүлье. Залуучуудынхаа эрх чөлөөний төлөөх тэмцлийг идэвхжүүлье. Бидэнд алдах цаг хугацаа алга. Хамтдаа ардчиллын үйл хэргийг үргэлжлүүлж, Монгол орноо хөгжүүлнэ гэсэн зорилттойгоор Ардчилсан намын эе эвийг сахисан, нэгдсэн үйл хэрэг өнөөдрөөс эхэлж байна” хэмээн онцоллоо.
