Эсэргүүцээд байгаа хүмүүсийн үзэл бодлыг хүндэлж байна аа. Англи хэлийг бага наснаас зааснаар Монгол хэлний дархлаа, соёл, Монголоо алдана гэдэг дээр хэдэн аргумент хэлье.
1. Өнөөгийн Монголын нөхцөлд, 50-60 хүүхэдтэй ангид, долоо хоногт 2-3 хан цаг ороод, гараад Англиар ярих орчин байхгүй нөхцөлд Англи хэл бол зүгээр гадаад хэлний үүргээр суралцах процесс болдог. Хоёрдагч хэл болчихвол харин бүх албан харилцаа Англи хэл дээр болох гэх мэт ач холбогдлын зэрэг өндөрсөнө. Ийм нөхцөлд Англи хэл сураад сүйд болохгүй ч ядаж хэрэгтэй гэдгийг нь ойлгож, суралцах үйл явцыг дэмжих үйл ажиллагаанууд нэмэгдэнэ гэж итгэж байна.
2. Хэл бол соёл гэдэгтэй санал нийлнэ. Гэхдээ өөр орны хэл сурлаа гээд тухайн орны соёлоос суралцаж, илүү мэдээлэл, хөгжлийг өөртөө авна уу гэхээс өөрийн соёлыг алдах, огоорох нь тухайн хүний төлөвшил хүмүүжил, хандлагын асуудал байдаг гэж боддог.
3. Монголоо алдлаа, Монголоо орхин дайжлаа гэх шалтгаанууд гадаад хэл сурснаас болдоггүй, Монгол эх орон гэх сэтгэл, хүмүүжил төлөвшлийг эцэг эх, асран хамгаалагч, сурган хүмүүжүүлэгч бид өгөх учиртай юм. Хүүхдийнхээ хажууд зогсоо зайгүй Монголынхоо бүх зүйлийг муулж, гадаадад очиж амьдрах тухай ярьж, хүсэж байгаа бол хүүхэд Монгол хүн болж төлөвшихгүй.
4. Боловсролын хөтөлбөр агуулгаар, соён гэгээрүүлэх, мэдээлэлжүүлэх, боловсрол түгээх замаар эх орон, Монгол соёл, өв уламжлалыг тасралтгүй зааж, түгээж байж Монгол өв соёл, хэл соёлын үнэ цэн илүү нэмэгдэж, тэр хэмжээгээр эх орноо гэсэн сэтгэлтэй иргэдээр нийгэм бүтнэ.
5. Гадаад хэл сураад, дэлхий дахины мэдээ, мэдээлэл, ШУ-ны судалгаа, нийтлэлээс цаг алдалгүй уншиж, суралцаж байж, хувь хүний хөгжил, цаашлаад улс орны хөгжил бий болно.
6. Үнэндээ Монголд үнэхээр хэрэг болчихоор эрдэм шинжилгээний нийтлэл алга байна. Ийм болохоор ШУ-ны үндэслэлтэй, судалгаатай шийдвэр, бодлого гэдэг зүйл ч алга. Олон нийтийн санаа бодол дээр л тулгуурлаж, бараг эсэргүүцвэл айсандаа шийдвэрээ өөрчилдөг тийм л тогтолцоотой улс болчихоод байна шүү дээ….гэх мэт бичээд байвал олон зүйл байна. Алим модноосоо хол унадаггүй гэдэг дээ. Бид өөрсдөө ямар байна, тийм л байна. Үүнд бусад хүчин зүйлсийг буруутгаад хэрэггүй биз ээ.
