Төрийн байгуулалтын болон Эдийн засгийн байнгын хорооны хамтарсан хуралдаан 2023 оны 3 сарын 20-ны 11.00 цагаас товлогдсон. Төрийн байгуулалтын байнгын хорооны хуралдаанаар Ж.Мөнхбатыг гишүүний бүрэн эрхээс нь чөлөөлөх асуудлыг хэлэлцэнэ гэх мэдээлэл байна.

АТГ-аас УИХ-ын гишүүн Ж.Мөнхбатыг Эрүүгийн хуулийн 22.1.3 буюу улс төрд нөлөө бүхий этгээд албан тушаалын байдлаа урвуулан ашиглаж бусдад давуу байдал бий болгож, хохирол учруулсан, Эрүүгийн хуулийн 22.10.2 буюу үндэслэлгүйгээр хөрөнгөжсөн хэмээн шалгаж буй.

Харин Ж.Мөнхбатын хувьд ээжийгээ асарч байгаа гэх шалтгаанаар БНСУ-руу хил давсан нь мөрдөн шалгах үйл ажиллагаас оргон зайлсан байж болзошгүй гэх хардлагыг төрүүлээд байгаа юм.

Хэдийгээр УИХ-ын гишүүн Ж.Мөнхбат нь өнгөрөгч Намрын чуулганы үеэр өөрийн хүсэлтээр чөлөөлөгдөх хүсэлтээ өгсөн ч, түүнийг УИХ-ын гишүүнээс чөлөөлөх асуудал Хаврын чуулганаар хэлэлцэгдэхээр хүлээгдэж байсан юм. Өөрөөр хэлбэл өнөөдрийг хүртэлх хугацаанд Ж.Мөнхбатын УИХ-ын гишүүний халдашгүй эрх хүчин төгөлдөр бөгөөд ямар нэг хилийн хориг тавигдаагүй байсан юм. Эндээс дүгнэхэд УИХ-ын чуулганы завсарлагын хугацааг ашиглаж Ж.Мөнхбат хилийн дээс давсныг оргон зайлсан байх магадлалтай гэж хардах шалтгаан болж байна.

Ташрамд дурдахад Ж.Мөнхбат нь УИХ-ын гишүүдийн viber групп, МАН-ын УИХ дахь бүлгийн viber групп зэргээс leave хийж гарсан нь хөдөлшгүй үнэн бөгөөд түүний энэ үйлдэл хардлагыг лавшруулах үндэс юм.